ბეღურები შეფარვიან რტოებს,

ჭადრის ხეებს შერჩენიათ ფოთოლი,

მე მივდივარ, მივდივარ და გტოვებ

მივდივარ და რაღა ამდღეს მოთოვა!

გული შემრჩა როგორც გუნდა თოვლის,

როგორც ნაძვი, ანდა როგორც ალერსი,

შენ დაგტოვე ისე, როგორც ტოლი,

როგორც თვალზე ცრემლი უნეტარესი.

ღამე მოდის, როგორც დილა მოვა,

რტოდან თოვლი ირხევა და იცინის;

თოვლისა და სიყვარულის დროა,

ნისლია და მე მივდივარ ნისლივით.

ბეღურები შეფარვიან რტოებს,

ჭადრის ხეებს შერჩენიათ ფოთოლი,

მე მივდივარ, მივდივარ და გტოვებ

მივდივარ და რაღა ამდღეს მოთოვა!