შენი თვალებით მოტანილ დილას,

შენი სხეულით მოტანილ სითბოს,

წყნარად ვაშორებ ღრუბელთა ფთილას

და ვიკარგები ღრუბლებში თვითონ.

და გტოვებ მარტო - სიმწვანედ მიწის,

და გტოვებ მარტო - ფერებად დილის,

აღმოსავლეთით მზის სხივი იწვის

შენი მკერდივით ნაზი და ფრთხილი.

და გტოვებ მარტო - სიმშვიდედ ქვეყნის,

და გტოვებ რაღაც პატარა დარდად,

და ვიცი, შემდეგ ბუნება შეგვყრის

ცის დასავალის ვარდისფერ კართან.