მენატრება შქერის რტო,

ტუია და კლერტა...

ხვალ რომ ჩემი დაბადების დღე იყოს,

რას მომიტან, ნეტა?

ვაი, ვეღარ ვხედავ მზეს,

ზედაზენს და მცხეთას,

ხვალ რომ ჩემი გაგიჟების დღე დადგეს,

რით მიწამლებ, ნეტა?

ქუჩა ქუჩა ალუბლებს

ქარი თეთრად პენტავს,

მეგობარო ამ გულს თუ ვერ გაუგე,

ვის გაუგებ ნეტა?

თითქოს სევდამ შემიპყრო.

ეს რა სიზმრებს ვხედავ?

დღეს რომ შენი დაბადების დღე იყოს

არ მიმიღებ, ნეტა?

ვაი, ვეღარ ვხედავ მზეს,

როცა შენ ვერ გხედავ,

დღეს რომ ჩემი აღსარების დღე დადგეს,

არ მომისმენ ნეტა?

მთვარე თეთრად მაბოდებს,

თეთრ ოთახში მკეტავს, -

საყვარელო, მე რომ ახლა არ მოვკვდე,

ხვალ რა მომკლავს, ნეტა?