ლექსებია ჩემი სულის ცხონება

ჩემს ცხოვრებას კვალი რომ დაამჩნია

ლექსებია მთელი ჩემი ქონება

ქვეყანაზე ნაღდი რაც გამაჩნია.

ლექსებია ჩემი გულის ტკივილი

თანაც მინდა მათმა წერამ მარჩინოს

ლექსებია ჩემი სულის კივილი

რამაც სიკვდილს უნდა გადამარჩინოს.

კარგი ლექსი თითქოს გულ-ღვიძლს ამომთხრის,

სიტყვად მოდის გულში ჩუმად ნამალი

ლექსებია გასაღები სამოთხის

ლექსებია უკვდავების წამალი.