ატმებთან და ნუშებთან და

წყაროსთან და ნაკადულთან -

გათენდა და გაბრწყინდა და

გამწვანდა და გაზაფხულდა.

მანანებს და მალხაზებს და

ფატმანებს და ფარნავაზებს -

ახარებს და აყვირებს და

ალაღებს და ალამაზებს.

თვალადებს და ტანადებს და

ამაყებს და ახოვანებს -

ამაღლებს და ამხნევებს და

ამღერებს და ახმოვანებს.

ქვეყნებსა და კონტინენტებს,

საზღვრებსა და სატახტოებს -

ამშვიდებს და აზავებს და 

არიგებს და აახლოვებს.

აფრიკა და ამერიკა,

ევროპა და ევრაზია -

ჩემია და შენია და 

ჩვენია და ყველასია.