რაც ძველებმა იზარალეს

და რაც არ დაიზარეს, -

მე რო მინდა,

ის არ არის,

შენ რო გინდა,

ის არის.

ყურს მიიპყრობს მისი ქება,

ყურად იღებს ნიჟარა:

შენ რო გინდა,

ის იქნება,

მე რო მინდა,

ის არა.

ვიწვევ ლუვრის შენობიდან

მონა ლიზა - ლიზიკოს:

მე რომ მინდა,

შენ რო გინდა,

ჩვენ რო გვინდა, -

ის იყოს!

აგე, ყველა სიონიდან

თავს გვაწონებს დიანა -

თავის რუბენსიანა და

თავის

რემბრანტიანა.

მოუხმობენ არენდართა

და მემატიანეთა

დასებს - ანტუანეტა და

ანტიანტუანეტა.

და მე მინდა,

მოდასეთა

დარბაზს მოვუბოდიშო:

მხოლოდ ერთხელ მოდისო და

მხოლოდ ერთხელ მოდისო!