შუა ქუჩაში ვდგავარ და ვუსმენ,

როგორ გუგუნებს ლითონის გული,

როგორ გადადის ლითონის გულზე

მარადისობის დინება ბრძნული.

რა ჰქვია ამ ცივ ფოლადის რეკვას?

დრო? დავიწყება თუ ხმა ფარული?

ბრმა ფრინველივით ვერ ამოკენკა

ჩემი სულიდან ის სინანული.

მე ბედნიერი ვიყავი მაშინ,

როდესაც მარტო შენზე ვფიქრობდი,

როცა ბარდივით ეკლიან ცაში

ტანდაკაწრული სადღაც მივქროდი.

სადღაც მივქროდი... ვდგავარ და ვუსმენ,

როგორ გუგუნებს ლითონის გული,

როგორ გადადის ლითონის გულზე

მარადისობის დინება ბრძნული...