უფლის შეწევნით, წმინდა გიორგის მეოხებით, მამა გრიგოლის ლოცვითა და გაბრიელ დაფანჩულის მოღვაწეობით ხანძთაში ქვითკირის ეკლესიის მშენებლობა წარმატებით დასრულდა.
ამის შემდეგ უდაბნოში სამონასტრო მშენებლობა უფრო ფართოდ გაიშალა.
აშოტ კურაპალატისა და მისი შვილების დახმარებით გრიგოლმა შატბერდის მონასტერი ააგო, ხოლო მისმა მოწაფემ საბა იშხნელმა იშხნის მონასტერი ხელმეორედ ააშენა.
აფხაზთა მეფის დემეტრეს კეთილმორწმუნოებითა და თხოვნით გრიგოლმა უბეის მონასტერი ააგო.
დიდებულნი ხშირად სტუმრობდნენ გრიგოლს, მასაც ეძახდნენ სასახლის კარზე და მარადჟამს ცდილობდნენ წმინდა მამების საქმეთა მოზიარენი გამხდარიყვნენ.
