აკაკი წერეთელი - ნაკადული

სწავლა წყარო არს ცხოვრების,

სიბრძნე მისი ნაკადული

და ნაყოფი მათი ერთად -

შვება, ლხენა, სიხარული.

დედის რძესთან ვინც შეწოვა

მისი ქვეყნის სიყვარული,

მას გაუწმენდს სულსა და გულს

ეროვნული ნაკადული.

მაგრამ შრატსა დედინაცვლის

ვინც კი დააჯერა გული,

იმას უწევს ნაღველ-შხამად

ცხრა მთას იქით ნაკადული.

და შენც ყრმაო, თუ გსურს გახდე

შენი ქვეყნის ძე ერთგული,

შესვი წყარო ეროვნების!

გწამდეს მისი ნაკადული!..

გახსოვდეს, რომ სწავლა არის

წყარო!.. სიბრძნე - ნაკადული!..

და ნაყოფი მათი ტკბილი -

შვება, ლხენა, სიხარული.

შეიძლება დაგაინტერესოთ