მთვარე ხორცით გაივსო.

მოსწყდა უნაზეს მუცელს, აბრეშუმის საბუდარს

მთვარე ხორცით გაივსო.

ხსნიან რუმბებს მარნებში, ყოჩი დაკლეს მყვირალი

მოზვერი საგაისო.

უბნებში გადადიან ცეცხლები ყირამალა

მღერის ვაჟთა კრებული

ყივჩაღურად თამაშობს

გოგო ჩამკვრივებული…

სოფლებზე წამოვიდა მთვარიანი მორევი -

გამოსული ლორივით

მთვარე ხორცით გაივსო.

იორის ნაპირებზე

ისევ ისმის „აჲსე“.

მიწა, დედალო, ადუღდი მაჭრად

დუმით გადაზელილს ვეძებ შენს ძუძუებს

მაწოვე! შევხვრიტო დვრიტა და შრატი

რომ გავძღე უცებ.

მოდგეს და მოდგეს გატენილი შენი ნახირი

მე წყურვილი გამინახევროს

მოხსენი ჯიქანი შენი ნამთვარევი

ვაფეთებ თვალებს მე აფთარივით.

ქონების ჭრაქები ინთება ფერებად

მთვარე ტყირპით იბერება.