სხივნი მზისანი სამყაროში დაიფანტება,

შენ ზღვა ხარ ვრცელი და წვეთ-წვეთად დაიფანტები;

ქვეყნად რამდენი თოთო ბალღიც დაიბადება,

ქვეყნად იმდენჯერ შენ ხელახლა დაიბადები.

დაგიმორჩილეს სიყვარულმა და იმ ვარდებმა

და შეგრჩა ფერი სიყვარულის და იმ ვარდების;

ქვეყნად რამდენი თოთო ბალღიც დაიბადება,

ქვეყნად იმდენჯერ შენ ხელახლა დაიბადები.

ბევრჯერ შეცვალა ვარდობისთვე თოვლის ფანტელმა

და ბევრჯერ მწვანით შეიცვალა თოვლის ფანტელი;

ქვეყნად რამდენი გაზაფხულიც დაიბადება,

ქვეყნად იმდენჯერ შენ ხელახლა დაიბადები.

გადაუქროლეს დიდ სამარეს წლებმა რამდენმა,

გადაივლიან დიდ სამარეს წლები რამდენი;

ქვეყნად რამდენი თოთო ბალღიც დაიბადება,

ქვეყნად იმდენჯერ შენ ხელახლა დაიბადები...