ნაადრევად ჩამოთოვა,

გამიფუჭდა გუნება,

თმაში ვერცხლი მომეძალა,

რა მესიყვარულება.

ქარში ჩემი ნატვრის ბაღი

ვერ გადარჩა უვნებლად,

ია ისე გაითოშა,

რა მესიყვარულება.

მიფრინავენ წეროები, 

მიფრინავენ გუნდებად,

მე კი მარტოდმარტო დავრჩი,

რა მესიყვარულება.

მთვარეს ფერი დაელია, 

ჩემს თვალის წინ ხუნდება, 

იმნაირად დავიბენი, 

რა მესიყვარულება.

ის სიზმარი საოცნებო

თუ არ დამიბრუნდება, 

რაღა მინდა ქვეყანაზე,

რა მესიყვარულება.