ვგონებ, ცოდვის ზღვაში ვიძირებით,

გულის გახეთქვამდე ვყვირი მე, -

„დანაღმულია დედამიწა გვირილებით,

ფეხი არ დაადგათ გვირილებს!”

არ შეცდეთ, ბალახი არ ააღელვოთ,

ვინ არის, ჩექმებით რომ ეთრევა, -

„ტყვია არ ესროლოთ მთა და მდელოს,

თოფის წამალივით ფეთქებადს!”

ინებეთ პატარა განმარტება:

სული თუნდ ფრჩხილებით დამკაწრეთ, -

ცოდვილთ ცოდვა თავზე დაგატყდებათ,

ხელი არ შეახოთ ამ ტაძრებს.

ჭირად სიყვარული შეგვეყარა,

დიდ არს ღვთის ძალა და ერის ხმა, -

გული არ ატკინოთ ჩემს ქვეყანას,

დედა-ღვთისმშობელი შეგრისხავთ.

მტრად ნუ ეკიდებით, ცუდად არ ახსენოთ,

ნურც ვინ გამოიწევთ საჩხუბრად,

ფრთხილად, ვულკანზე დგას დედამიწა

დაიღუპება და დაგღუპავთ!

სულო, თვალს და ხელს შუა მიფრინდები,

მიწა მწყურვალ ფესვებს მიგრილებს,

„დანაღმულია დედამიწა გვირილებით,

ფეხი არ დაადგათ გვირილებს!”