როგორც წესი, უჩინოა ტალღის ბედი.

მათგან მხოლოდ მეცხრესა აქვს ისტორია!

ამიტომაც მილივლივებს წყნარი ტალღა,

მიტომ  არ სდევს მის მილევას ისტერია.

შიში, შიში,  ბაბაია! დიდი შიში!

დასდევს დიდრონ ტალღებს შიში და მანია.

საშიშეთში მოთარეშე თვითონ მშიშრებს

უმშიშრესი ტალღის შიში აბარიათ.

და არავის არ ადარდებს წყნარი ტალღა,

თუმც თვითონაც არ ეძლევა მისტერიებს...

მეცხრე? მეცხრე  მშვიდ ტალღებზე თავსმომჯდარი,

აცხობს  ცხელ-ცხელ ისტორიულ ისტერიებს.