ჩვენს ხალხს ცხვარი იმდენად სასარგებლო ცხოველად მიაჩნია, რომ ფიქრობს, სადაც ცხვარი იმრავლებს, იქ სიღარიბე გაქრებაო.
ეს აზრი ხალხს ზღაპარშიაც გამოუთქვამს.
იაკობ გოგებაშვილი
ცხვარი შევიდა სახლში, დაინახა სიღარიბე, ფეხები დაუბაკუნა და დაუყვირა:
- ადე, სიღარიბევ, გამეცალე აქედანაო!
- რად უნდა გაგეცალო? ეს სახლი ჩემიაო!
- შენი კი არა, ჩემთვის უფრო უპრიანია, ახლავე უნდა გამეცალოო!
რომ გაუჭირა საქმე ცხვარმა, სიღარიბემ სთხოვა:
- სახლის ნახევარი მაინც დამითმეო
- არა, ვერ დაგითმობო
ბოლოს სიღარიბე შეეხვეწა:
- ერთი კუნჭული მაინც დამითმეო
- ვერ დაგითმობ, მთელი სახლი უნდა დავისაკუთროო
- რად გინდაო?
- ერთ კუთხეში მე უნდა დავდგე, მეორეში ჩემი ბატკნები უნდა დავაყენო, მესამეში დაკრეჭილ მატყლს დავაგროვებ და მეოთხეში კი ჩემი რძის ყველსაო.
ადგა სიღარიბე და გაეცალა. მთელი სახლი ცხვარს დარჩა.
