რთველშია მთელი კახეთი,

ზეიმობს არემარეო.

მტევანი რაა, კუმპალიც

პირთან არ გავიკარეო.

ვერ მოვიცალე ჭამისთვის,

ვკრიფე და ოფლი ვღვარეო,

ზვარში ვიყავით ღამითაც,

სანამ გვიმზერდა მთვარეო.

ძილსაც კი გადავავიწყდი,

ერთხელ არ დავამთქნარეო.

თუმც დავიღალე, არ ვდარდობ,

ვნახე ზვრიანი მხარეო.

ბევრიც ვიშრომე და ბევრიც

ვილხინე, ვიხარხარეო.

რთველი რა კარგი ყოფილა,

ჰო, რარიგ გავიხარეო!