გაჰკრა ბაბუა ზამთარმა,

ზეცა გაფხრიწა ნეკითა,

დაეშვა თოვლის ფანტელი,

ერთმანეთს გამოეკიდა.

მეცნო მრავალი შრიალა,

მსუბუქი ფრთების ფარფატი.

დაიგო თეთრი ფთილების

მოუთელავი ნაბადი.

აბა, გიყვარდეს სრიალი!

სამ-სამი ერთად ვეშვებით.

მაღლიდან გუნდებს გვაყრიან

ნაძვები სავსე პეშვებით.

რტოდან ჩიტუნას აფრენით

თოვლის ბზე ჩამოგვეყარა,

ამ აღმა-დაღმა სრიალში

ჩემი მგონია ქვეყანა!