როგორც ლამაზ ქალზე

დარხეული ჭორი,

ისე ვეხეტები, ისე ვეხეტები,

ყველა ფანჯარასთან

გაიფოთლა ბჟოლი,

ყველა ფანჯარაში ჩუმად ვიხედები.

ვუმზერ ახალ სახლებს,

ვუსმენ ახალ ჭორებს,

ვევაჭრები ვარდებს,

ვიძენ ყაყაჩოებს.

გვერდზე ჩამივლიან,

უკან ვიხედები,

ნაცნობს ვესალმები

ხან აქ,

ხან იქ,

ხან სად.

ისევ ვეხეტები,

ისევ ვეხეტები,

მე შენთანაც მოვალ,

დავყოფ მცირე ხანსა.

მე იდუმალ მოვალ,

ფეხაკრეფით შევალ,

სულ არ ვეჩვენები

ჯანდიერის დებს...

გასაღები? - ვიცი,

ფარდის უკან დევს...