ღრუბლებს ხედნის ქარი, 

ერეკება რაშებს 

და ფოთოლთა ჯარით 

ირგვლივ დაპარპაშებს.

ცას გააპობს ელვა, 

მიკიოტი კივის. 

ტყემ დაიწყო ღელვა 

და ოხრავს კაცივით.

მოვუყვები ბილიკს, 

უღრანებში მივალ. 

ჩხიკვი იწყებს ქილიკს, 

ნელსურნელობს თივა.

ზის წიწვების ბადით 

წითელკაბა სოკო 

და ველური ვარდი 

მიწვდის თავის კოკორს.

მალე გაწვიმდება, 

ტყეს არ უჩანს ბოლო 

და გზადაგზა მხვდება 

მოცხარი და ჟოლო.

გადავურჩე წვიმას 

არა მაქვს იმედი. 

ქარი გაიჭიმა, 

ქარი ღრუბლებს ხედნის.