არჩილ სულაკაური - რა მიხარია...

სულ მალე მოვა ახალი წელი,

მივეგებები ცისფერ ინფანტას,

რომ ჩემი სახლის მაღალი ჭერი

მისი სხივებით მიმოიფანტოს.

რა მიხარია?

რა მიხარია

ის, რომ ერთი წლით უფრო ვბერდები,

რომ ჩემს მწვერვალზე თოვლის ქარია

და მე ამ ქარებს არ დავნებდები.

რომ დავინახავ ცისფერ ღიმილში

ჩემი მამულის ახალრთველობას,

ის რომ თბილისი არის თბილისი

და საქართველო საქართველოა.

რა მიხარია?

მე მიხარია,

რომ მყავხარ ქვეყნად ერთი ნუგეში

და გულში ახლაც ის გრიგალია -

ამოვარდნილი სიჭაბუკეში.

კარს შემოაღებს ახალი წელი

მივეგებები ცისფერ ინფანტას,

რომ ჩემი სულის მაღალი ჭერი

მისი ღიმილით მიმოიფანტოს.

შეიძლება დაგაინტერესოთ