გაკვირტულა,

გაკვირტულა,

შინდის ტოტი გაკვირტულა!

ჩიტი დახტის შინდის ტოტზე,

განა ერთი,

ცხრა ჩიტუნა!

წყარო მთიდან მოჩუხჩუხე

ბარში დადგა, გაიტრუნა.

ცივ ჩქერს ჩიტი დაეწაფა,

განა ერთი

ცხრა ჩიტუნა!

გაზაფხულდა,

ტყის ფერდობი

ჩითის ფერად დაჩითულა.

ჩიტი გალობს ტყის ფერდობზე,

განა ერთი

ცხრა ჩიტუნა!

ნაწვიმარზე ცისარტყელამ

ცა მოხატა დიდებულად.

შეხე, ჩვენი საქართველო

როგორ აყვავილებულა!