მეძინა და პაპაჩემმა

უთენია წამომაგდო,

- წუხელ მთელი ღამე თოვდა,

ნახე, რამოდენა დადო!

რა ხანია არ მინახავს

ასე მსხვილი ფიფქის ცვენა,

ამ თოვლმა და ამ ზამთარმა

სიყმაწვილე გამახსენა.

მოფარფატე ფანტელებმა

ყველაფერი გადაპენტა,

ეს ციური სიქათქათე

ასე დიდ ხანს დარჩეს ნეტა.

პაპამ ციგა გამიმზადა,

ბებომ თბილი სამოსელი,

ვისაუზმე, ჩავიფუთნე,

ციგას წამოვავლე ხელი,

სიხარულის ყიჟინაა,

ყველა გამოსულა გარეთ,

თოვლის პაპას გავაკეთებთ,

ვიგუნდავებთ, ვიციგავებთ.